SANTAPAN HARIAN KELUARGA, KAMIS, 22 AGUSTUS 2024 : MAZMUR 119 : 9 - 11
#shkbugpm edisi edisi 22 Agustus 2024 : Mazmur 119 : 9 - 11 - Ingat Firman, Jaga Diri, Biking Bae
Par katong orang Kristen, Firman Tuhan adalah kekuatan. Maka hidup tanpa Firman Tuhan, hidup seng akan kuat. Hidup di luar Firman Tuhan, hidup pasti kacau. Apalagi hidup di dunia sekarang ini, dunia yang berkembang su bagus tapi pengaruh seng bae jua paling kuat. Orang yang seng kuat, anyo. Arus taputar kiri-kanan. Sen bisa cuma pake otak, apalai pake pakatang, ancor panggal. Mo harap sapa? Mo harap apa? Seng ada yang bisa bantu. Samua sama-sama seng kuat par hadapi dunya pung hal-hal. Apalai mo harap dunya, lebih ancor lai. Maka jang parcaya sapa-sapa kata bisa bantu. Parcuma. Yang Bisa bantu cuma Tuhan. Yang bisa biking kuat batahang cuma firman Tuhan. Tuhan kasih tau dalam Mazmur yang katong baca hari ini. Coba lia kata-kata Mazmur ini bae-bae. Mazmur bilang: Deng apa orang muda (= umur masih muda dan belum banyak pengalaman dalam tanggungjawab) bisa tetap hidup bae? Akang pung kunci cuma : Jaga hidup sesuai dengan Tuhan pung Firman, seng menyimpang dari yang Tuhan suruh, simpan dalam hati Tuhan pung jani dan cari Tuhan setiap waktu. Akang pung arti sama deng, mo biking apa-apa, inga apa yang Tuhan bilang: Kalu Tuhan larang, iko karena itu bae, cegah katong supaya jang kajahatang, kalabor, lalu ancor; Kalo Tuhan bilang biking, biking akang karena yang Tuhan suruh itu pasti akang bae, maka katong pasti dapa bae lai. Tuhan Yesus mo berkati katong tarus-tarus.
Doa : Tuhan Yesus, tolong beta supaya beta selalu inga Tuhan pung Firman la beta jaga diri deng biking bae. Amin.
